''ഞാന്‍ മുഅ്മിനാണ്; ഇന്‍ഷാ അല്ലാഹ്' എന്ന് പറയാമോ?
ചോദ്യം: ‘ഞാന്‍ മുഅ്മിനാണ്; ഇന്‍ഷാ അല്ലാഹ്’ എന്ന് പറയുന്നതിന്‍റെ വിധി എന്താണ്?
ഉത്തരം: ‘ഞാന്‍ മുഅ്മിനാണ്; ഇന്‍ഷാ അല്ലാഹ്’ എന്നിങ്ങനെ പറയാന്‍ അനുവാദമുണ്ടോ ഇല്ലേ എന്ന വിഷയത്തെ ‘ഇസ്തിസ്നാഇന്‍റെ മസ്അല’ എന്നാണ് സാധാരണയായി പണ്ഡിതന്മാര്‍ വിശേഷിപ്പിക്കാറുള്ളത്. ഇത് കുറച്ചു വിശദീകരിക്കേണ്ട വിഷയമാണ്:
ഒന്ന്: ഒരാള്‍ ‘ഞാന്‍ മുഅ്മിനായിരിക്കാം; അല്ലാതെയുമായേക്കാം’ എന്ന സംശയം കാരണത്താലാണ് ‘ഇന്‍ഷാ അല്ലാഹ്’ എന്ന് പറയുന്നതെങ്കില്‍ അത് നിഷിദ്ധമാണ്. അല്ല! അത് കുഫ്ര്‍ തന്നെയാണ്. കാരണം ഈമാന്‍ ഉണ്ട് എന്നത് ദൃഢബോധ്യമുണ്ടായിരിക്കേണ്ട കാര്യമാണ്; അതില്‍ സംശയമുണ്ടാകാന്‍ പാടില്ല.
രണ്ട്: ഇനി ഒരാള്‍ ‘ഞാന്‍ മുഅ്മിനാണ്’ എന്ന് പറയുമ്പോള്‍ അതൊരു സ്വയം പുകഴ്ത്തലും, വാക്കിലും പ്രവൃത്തിയിലും വിശ്വാസത്തിലും ഈമാന്‍ പൂര്‍ത്തീകരിച്ച വ്യക്തിയുാണ് താന്‍ എന്ന ധ്വനിയുണ്ടാക്കുമെന്ന ഭയം കാരണത്താലാണ് ‘ഇന്‍ഷാ അല്ലാഹ്’ എന്ന് പറയുന്നതെങ്കില്‍; അത് വാജിബ് (നിര്‍ബന്ധം) ആണ്.
മൂന്ന്: ‘ഞാന്‍ മുഅ്മിനാണ്; ഇന്‍ഷാ അല്ലാഹ്’ എന്ന് പറയുന്ന സന്ദര്‍ഭത്തില്‍ അല്ലാഹുവിന്‍റെ നാമം ഓര്‍മ്മപ്പെടുത്തുവാനോ, ഈമാന്‍ ഉണ്ടായതിന് പിന്നിലെ കാരണം വിശദമാക്കാനോ ആണ് ഒരാള്‍ ഉദ്ദേശിക്കുന്നതെങ്കില്‍ അത് അനുവദനീയമാണ്. ഉദാഹരണത്തിന്; എന്‍റെ ഹൃദയത്തിലുള്ള ഈമാന്‍ അല്ലാഹുവിന്‍റെ ഉദ്ധേശം കാരണത്താലാണ് ഉണ്ടായത് എന്ന അര്‍ഥത്തില്‍. ഇതൊരിക്കലും ഈമാന്‍ ഇല്ല എന്ന സൂചന നല്‍കുന്നില്ല.
ഈ പ്രയോഗം ഖുര്‍ആനിലും വന്നിട്ടുണ്ട്.
അല്ലാഹു പറഞ്ഞു:
«لَتَدْخُلُنَّ الْمَسْجِدَ الْحَرَامَ إِنْ شَاءَ اللَّهُ آمِنِينَ مُحَلِّقِينَ رُءُوسَكُمْ وَمُقَصِّرِينَ لَا تَخَافُونَ»
“സമാധാനചിത്തരായി കൊണ്ട് തല മുണ്ഡനം ചെയ്തവരും മുടി വെട്ടിയവരും ആയികൊണ്ട് നിങ്ങള്‍ ഒന്നും ഭയപ്പെടാതെ മസ്ജിദുല്‍ ഹറമില്‍ പ്രവേശിക്കുക തന്നെ ചെയ്യുന്നതാണ് -ഇന്‍ഷാ അല്ലാഹ്-.” (ഫത്ഹ്: 27)
ഖബര്‍ സന്ദശനവേളയില്‍ നബി -ﷺ- പഠിപ്പിച്ച ദുആഉം ഒരുദാഹരണമാണ്. അവിടുന്ന് പറഞ്ഞു:
«وَإِنَّا إِنْ شَاءَ اللَّهُ بِكُمْ لَاحِقُونَ»
“ഞങ്ങളും -ഇന്‍ഷാ അല്ലാഹ്- നിങ്ങളോടൊപ്പം ചേരുന്നവരാണ്.”
ചുരുക്കത്തില്‍; ഈ വിഷയത്തില്‍ നിരുപാധികം ഒരു വിധി പറയാന്‍ കഴിയില്ലെന്നും, വിശദീകരിച്ച് മനസ്സിലാക്കേണ്ട ഒരു കാര്യമാണിതെന്നും മനസ്സിലാക്കാം.
(മജ്മൂഉ ഫതാവ ഇബ്നി ഉഥൈമീന്‍: 3/85)
